Í því augnamiði að tryggja að opinberun sín myndi ná fram markmiði sínu um að sameina heiminn og að trúin myndi varðveita einingu sína útnefndi Bahá’u’lláh elsta son sinn, ‘Abdu’l‑Bahá sem miðju sáttmála síns og kvað á um stofnun Allsherjarhúss réttvísinnar. Um fjórtán árum eftir að ‘Abdu’l‑Bahá tók við af föður sínum skrifaði hann erfðaskrá þar sem Shoghi Effendi, dóttursyni hans, var falið að taka við af honum í hlutverki Verndara trúarinnar auk þess sem hann kvað á um ákveðnar meginreglur sem Allsherjarhúsið ætti að starfa eftir.

Bæði Allsherjarhús réttvísinnar og Verndarinn fengu það hlutverk að beita meginreglum trúarinnar, framfylgja lögum hennar, vernda stofnanir hennar og laga trúna að síbreytilegum þörfum síframsækinnar siðmenningar.

Í stjórnartíð Shoghi Effendi þróaðist stjórnskipulagið sem Bahá’u’lláh hannaði til að hafa umsjón með málefnum trúarinnar hratt um allan heim. Hann þýddi fjölmörg helgirit trúarinnar yfir á ensku, þróaði andlega og stjórnfarslega miðstöð trúarinnar í Landinu helga og gaf ríka innsýn inn í andlega vídd siðmenningar og eðli þjóðfélagslegra umbreytinga í þúsundum bréfa sem hann skrifaði og svipti hulunni af mikilfenglegri framtíð sem bíður mannkynsins.